«Barselona» bosh murabbiyi Xans-Diter Flik Ispaniya chempionatining 33-turida «Selta»ga qarshi o‘yinda (1:0) jarohat olgan Lamin Yamal va Joau Kanselu haqida fikr bildirdi. Futbolchilar birinchi bo‘lim oxirida maydonni tark etgan edi.
«Ertagacha kutish kerak. Yamal qandaydir noqulaylikni his qildi, demak, muammo bor. Joau Kanselu bilan bog‘liq holat jiddiy emasdek, ammo bu borada ham yakuniy xulosani kutish kerak. Lamin Yamalda jarohat bordek tuyulmoqda, lekin u qancha vaqtga maydondan chetda qolishini aniqlashimiz lozim. Hozircha boshqa gap ayta olmayman — kutish kerak.
Murabbiy sifatida bunday vaziyatlarni qabul qilishing kerak. Afsuski, Lamin aynan shu paytda jarohat oldi. Shu bilan birga men Rafinya, Mark Bernal, Andreas Kristensen haqida ham o‘ylayapman. Endi e’tiborni «Xetafe»ga qarshi o‘yinga qaratish kerak. Men xafa deb aytmasdim — boshimda ko‘p fikrlar bor. Biz kurashdik», — dedi Xans-Diter Flik. Uning so‘zlarini AS keltirdi.
Joriy mavsumda Lamin Yamal barcha musobaqalarda 45 ta o‘yinda ishtirok etib, 24 ta gol va 18 ta golli uzatma muallifi bo‘lgan.













