«Manchester Siti» bosh murabbiyi Xosep Gvardiola «Byornli»ga qarshi o‘yinda jamoaning omadi keldi, degan fikrlarga o‘z munosabatini bildirdi.
Angliya Premyer-ligasining 34-turidan o‘rin olgan mazkur uchrashuv «shaharliklar»ning 1:0 hisobidagi minimal g‘alabasi bilan yakunlangan edi.
«Hayotda omad muhim, lekin unga loyiq bo‘lish uchun ham nimadir qilish kerak, shunday emasmi? Biz 28 ta zarba yo‘lladik. Har bir o‘yinda qancha ko‘p harakat qilsak, g‘alaba qozonish uchun omad shunchalik ko‘p kulib boqadi», — deya Gvardiolaning so‘zlaridan iqtibos keltiradi jurnalist Fabrisio Romano.
