«Chelsi» yarim himoyachisi Enso Fernandes APLning bir klubini boshqasiga almashtirishi mumkin. Bu haqda The Athletic nashri xabar bermoqda.

Manba ma’lumotlariga ko‘ra, futbolchiga «Manchester Siti» qiziqish bildirmoqda. Shu bilan birga, «shaharliklar» Fernandesni birinchi raqamli transfer maqsadi deb hisoblamayaptilar va uning ampluasidagi boshqa variantlarni ham ko‘rib chiqishmoqda — xususan, «Nottingem Forest»dan Elliot Anderson nomzodi ham bor. «Manchester Siti»ning qiziqishi yozda jamoani Bernardu Silva tark etishi bilan bog‘liq. Shuningdek, Rodrining ham kelajagi hozircha noma’lum (uning shartnomasi 2027 yilgacha amal qiladi, ammo klub uni uzaytirishdan umidvor).

Transfermarkt talqiniga ko‘ra bozor qiymati 90 million yevroni tashkil etuvchi Fernandesning «Chelsi» bilan shartnomasi 2032 yilgacha mo‘ljallangan. Joriy mavsumda u 48 ta o‘yinda maydonga tushib, 12 ta gol urdi va 6 ta golli uzatmani amalga oshirdi.