«Barselona» va Ispaniya terma jamoasi vingeri Lamin Yamal o‘zining jarohati haqida fikr bildirdi.

«Maydonda bo‘lmasam-da, men siz bilan birgaman. Jamoaning oddiy bir a’zosi sifatida sizni qo‘llab-quvvatlayman va ruhlantirib turaman. Bu yakun emas, shunchaki tanaffus. Men yanada katta ishtiyoq bilan qaytaman, keyingi mavsum esa o‘tganidan ham yaxshiroq bo‘ladi», — deb yozdi Yamal ijtimoiy tarmoqdagi sahifasida o‘z klubiga murojaat qilib.

Eslatib o‘tamiz, jarohati sababli Yamal mavsumning qolgan qismini o‘tkazib yuboradi, biroq Shimoliy Amerikada bo‘lib o‘tadigan Jahon chempionatida «qizil furiya» tarkibida ishtirok eta oladi.

Qayd etish joizki, 18 yoshli vunderkind joriy mavsumda jami 45 ta rasmiy uchrashuvda maydonga tushib, 24 ta gol va 18 ta golli uzatmaga mualliflik qildi.