«Pari Sen-Jermen» rahbari Nasser al-Xelayfiy klubning so‘nggi yillarda YECHLdagi muvaffaqiyatlarini yuqori baholadi. Parijliklar eng nufuzli yevrokubokning joriy mavsumida yarim finalga yo‘l oldi va unda «Bavariya» bilan kuch sinashadi.

O‘tgan mavsumda Luis Enrike shogirdlari o‘z tarixida ilk bor turnir g‘olibiga aylanishgan edi, ikki yil avval esa aynan yarim final bosqichida musobaqani tark etishgandi.

«Championlar ligasida ketma-ket uch yil yarim finalga chiqish uchun eng yuqori sport formasida bo‘lish kerak. Bu jiddiy yutuq, chunki turnirda kuchli jamoalar juda ko‘p va raqobat nihoyatda yuqori», – dedi al-Xelayfi Le Forum nashriga bergan intervyusida.

28 aprel kuni Parijda «PSJ» va «Bavariya» o‘rtasidagi dastlabki uchrashuv bo‘lib o‘tadi, javob o‘yini esa 6 may kuni Myunxenda o‘tkaziladi.