«Barselona» vingeri Rafinya Dias jarohatidan so‘ng safga qaytishga yaqin turibdi. Braziliyalik futbolchi sog‘ayib bo‘ldi va kelasi hafta boshidan jamoaning to‘liq mashg‘ulotlariga qo‘shiladi, deb xabar bermoqda jurnalist Ashraf ben Ayad.

Eslatib o‘tamiz, Rafinya mart oyi oxirida Braziliya terma jamoasi ixtiyorida bo‘lgan vaqtida jarohat olgan edi. 29 yoshli futbolchi «ko‘k-anorranglilar»ning oxirgi beshta o‘yinini, jumladan, Chempionlar ligasi doirasida Madridning «Atletiko» klubiga qarshi kechgan va kataloniyaliklar uchun muvaffaqiyatsiz yakunlangan ikkala bahsni ham o‘tkazib yubordi.

Shanba kuni, 25 aprel sanasida «Barselona» La Liga doirasida «Xetafe»ga qarshi maydonga tushadi, bir haftadan so‘ng esa «Osasuna» bilan bahs bo‘lib o‘tadi.