«Manchester Siti» vingeri Jeremi Doku mavsumning hal qiluvchi pallasi oldidan o‘z kayfiyati bilan o‘rtoqlashdi. «Shaharliklar» yaqingacha 9 ochko ortda qolayotgan bo‘lsa-da, Premyer-liga turnir jadvalida «Arsenal»dan o‘zib ketishga muvaffaq bo‘lishdi.
Shuningdek, Xosep Gvardiola jamoasi Angliya Kubogida ham g‘oliblikka da’vogarlik qilmoqda — yarim finalda ular «Sautgempton»ga qarshi maydonga tushishadi.
«Men Angliya Kubogi va Premyer-ligada g‘olib chiqishni istayman. Ilgari Angliya chempioni bo‘lganman, ammo motivasiyam pasaygani yo‘q — doim g‘alaba qozonishni xohlayman. G‘alabalardan charchab qolmaysan. Nimaga erishgan bo‘lsang ham, senga doim kamidek tuyulaveradi», — deya jurnalist Djeremi Kross Dokuning so‘zlarini keltirmoqda.
«Sautgempton»ga qarshi yarim final uchrashuvi shu shanba kuni bo‘lib o‘tadi.
