«Manchester Yunayted»dan ijaraga olingan «Barselona» vingeri Markus Reshford Premyer-liganing boshqa bir klubiga o‘tishi mumkin. Angliya OAVlarining xabar berishicha, 28 yoshli futbolchini sotib olish imkoniyatini «Arsenal» ko‘rib chiqmoqda.
Reshford «kanonirlar» uchun asosiy maqsad emas, biroq boshqa muhimroq nomzodlarni qo‘lga kiritish imkoni bo‘lmasa, uning varianti dolzarb bo‘lib qolishi mumkin. Ingliz futbolchisining «Barselona»dagi kelajagi esa noma’lumligicha qolmoqda: «ko‘k-anorranglilar» uni 30 million yevroga sotib olish bo‘yicha birinchi navbatdagi huquqqa ega, biroq kataloniyaliklar ushbu bandni faollashtirishga unchalik ishtiyoq bildirishmayapti.
Agar La Liga grandi «Manchester Yunayted» bilan transfer shartlarini kelisha olmasa, kurashga boshqa da’vogarlar qo‘shiladi.
