Londonning «Chelsi» klubi sobiq sardori Jon Terri Liam Rosenyor iste’fosidan so‘ng jamoada yuzaga kelgan holat va yangi murabbiylar shtabining shakllanishi borasida o‘z fikrlarini bildirib o‘tdi.

Klub rahbariyati jamoani vaqtinchalik Kalum Makfarlen ixtiyoriga topshirgan bo‘lsa-da, Terri yangi shtabga taklif etilmaganidan noroziligini yashirmadi.

«Men juda xafaman va g‘azabdaman. «Chelsi» muxlislarining tushkunligini ham tushunib turibman. Kalumning shtabi qanday ko‘rinish olishini bilmayman — menga bu borada hech kim qo‘ng‘iroq qilgani yoki xabar bergani yo‘q. Akademiyadagi ishimni davom ettiraveraman», — dedi Terri Foot Mercato nashriga bergan intervyusida.

Ma’lumot uchun, «Chelsi» afsonasi sanalgan Jon Terri faoliyati davomida londonliklar bilan jami 15 ta sovrinni qo‘lga kiritgan. Hozirda u klub akademiyasida mustaqil maslahatchi sifatida faoliyat yuritmoqda.

Terri murabbiylik sohasida ham tajribaga ega bo‘lib, ilgari «Aston Villa» va «Lester» klublarida bosh murabbiy yordamchisi lavozimida ishlagan.