Лондоннинг «Челси» клуби собиқ сардори Жон Терри Лиам Росеньор истеъфосидан сўнг жамоада юзага келган ҳолат ва янги мураббийлар штабининг шаклланиши борасида ўз фикрларини билдириб ўтди.

Клуб раҳбарияти жамоани вақтинчалик Калум Макфарлен ихтиёрига топширган бўлса-да, Терри янги штабга таклиф этилмаганидан норозилигини яширмади.

«Мен жуда хафаман ва ғазабдаман. «Челси» мухлисларининг тушкунлигини ҳам тушуниб турибман. Калумнинг штаби қандай кўриниш олишини билмайман — менга бу борада ҳеч ким қўнғироқ қилгани ёки хабар бергани йўқ. Академиядаги ишимни давом эттиравераман», — деди Терри Foot Mercato нашрига берган интервьюсида.

Маълумот учун, «Челси» афсонаси саналган Жон Терри фаолияти давомида лондонликлар билан жами 15 та совринни қўлга киритган. Ҳозирда у клуб академиясида мустақил маслаҳатчи сифатида фаолият юритмоқда.

Терри мураббийлик соҳасида ҳам тажрибага эга бўлиб, илгари «Астон Вилла» ва «Лестер» клубларида бош мураббий ёрдамчиси лавозимида ишлаган.