Italiya terma jamoasi Jahon chempionatini ketma-ket uchinchi bor o‘tkazib yuboradigan bo‘ldi. Pley-off bosqichida Bosniya va Gersegovinaga imkoniyatni boy bergan “azzurri” turnirdan quruq qolgan bo‘lsa-da, AQSH tomonidan kutilmagan tashabbus ilgari surildi.

AQSHning maxsus vakili Paolo Zampolli FIFA’ga Eronni turnirdan chetlatib, uning o‘rniga Italiyani qo‘shish taklifi bilan chiqdi. Zampollining so‘zlariga ko‘ra, to‘rt karra jahon chempioni bo‘lgan Italiya o‘z nufuzi bilan ushbu musobaqaga loyiq va bu taklif Donald Tramp hamda Italiya bosh vaziri Jorja Meloni o‘rtasidagi sovuqlashgan munosabatlarni tiklashga xizmat qilishi mumkin. Tramp avvalroq Melonini Eron masalasida Rim papasini himoya qilgani uchun “qo‘rqoq” deb atagan va ular o‘rtasida siyosiy nizo kelib chiqqan edi.

Biroq Italiya hukumati va sport mutasaddilari ushbu kutilmagan “sovg‘a”ni keskin rad etishdi. Sport vaziri Andrea Abodi yo‘llanma faqat maydonda hal qilinishi kerakligini va bunday almashtirishning foydasi yo‘qligini aytdi. MOQ prezidenti Luchiano Buonfilyo esa bunday yo‘l bilan JCHga borishni o‘zi uchun haqorat deb bilishini ta’kidladi. Iqtisodiyot vaziri Jankarlo Jorjetti esa bunday vaziyatda shunchaki “uyalgan bo‘lardim” deya qisqa xulosa qildi.

O‘z navbatida, FIFA rahbari Janni Infantino ham Eronning ishtiroki aniq ekanini va sport siyosatdan tashqarida qolishi shartligini bildirdi. U eronlik futbolchilar o‘z xalqi uchun maydonga tushishga haqli ekanini va turnirga kelishini qayd etdi. Eron hukumati vakili Fotima Mojejerani ham terma jamoa turnirga to‘liq tayyorligini va 10 iyungacha Arizonadagi yig‘inga yetib borishini ma’lum qildi.