«Chelsi»dan ijaraga olingan hujumchi Nikolas Jekson mavsum yakunlangach, «Bavariya»ni tark etadi. Myunxen klubi senegallik futbolchini sotib olmaslik bo‘yicha yakuniy qarorga keldi, deb xabar bermoqda jurnalist Fabrisio Romano. Ushbu ma’lumotni Bundesliga grandining sport bo‘limi rahbari Maks Eberl ham tasdiqladi.
Iyul oyida forvard Londonga qaytadi. «Chelsi» 24 yoshli futbolchi borasidagi rejalarini hali aniqlab olmagan bo‘lsa-da, katta ehtimol bilan u sotuvga qo‘yiladi.
Nikolas Jekson joriy mavsumda «Bavariya» safida 29 ta uchrashuvda maydonga tushib, 10 ta gol urdi va 4 ta golli uzatmani amalga oshirdi. Transfermarkt ekspertlari o‘yinchining narxini 40 million yevroga baholamoqda.
