«Челси»дан ижарага олинган ҳужумчи Николас Жексон мавсум якунлангач, «Бавария»ни тарк этади. Мюнхен клуби сенегаллик футболчини сотиб олмаслик бўйича якуний қарорга келди, деб хабар бермоқда журналист Фабрицио Романо. Ушбу маълумотни Бундеслига грандининг спорт бўлими раҳбари Макс Эберль ҳам тасдиқлади.

Июль ойида форвард Лондонга қайтади. «Челси» 24 ёшли футболчи борасидаги режаларини ҳали аниқлаб олмаган бўлса-да, катта эҳтимол билан у сотувга қўйилади.

Николас Жексон жорий мавсумда «Бавария» сафида 29 та учрашувда майдонга тушиб, 10 та гол урди ва 4 та голли узатмани амалга оширди. Transfermarkt экспертлари ўйинчининг нархини 40 миллион еврога баҳоламоқда.