«Barselona» sobiq bosh murabbiyi Xavi Ernandes Rafinya Dias bilan bo‘lgan o‘zaro munosabatlari haqida so‘zlab berdi.

Braziliyalik vinger ilgariroq ispaniyalik mutaxassis qo‘l ostida o‘ziga bo‘lgan ishonchni his qilmaganini, chunki murabbiy uni doimiy ravishda 60-daqiqada almashtirib yuborishini tan olgan edi.

«Rafinyaning xafa bo‘lib yurgan vaqtidagi suhbatimizni eslayman. O‘shanda men: «Rafa, men sen bilan besh yillik shartnoma imzolaganman, xotirjam bo‘l! Biz senga ishonamiz, shunchaki tinchlan va o‘zingni ko‘rsat», deb ta’kidlagandim. Bilaman, doimiy almashtirishlar uning ruhiyatiga ijobiy ta’sir qilmagan, ammo hozir u o‘zini ajoyib tarzda namoyon etmoqda.

Rafinya bilan munosabatlarimiz yaxshi edi, biroq u shuni tushunishi kerak ediki, bizda o‘yin reja bo‘yicha ketmagan taqdirda, zaxiradan tushib vaziyatni o‘zgartira oladigan boshqa futbolchilar ham bor edi», — deya Xavining so‘zlarini keltiradi Barca Universal.

Eslatib o‘tamiz, Rafinya «Barsa»ga 2022 yilning yozida kelib qo‘shilgan. Xavi esa 2021 yilning oktyabridan 2024 yilning mayiga qadar jamoani boshqargan.