Ispaniya La Ligasining 32-turida «Real Sosyedad» hamda «Rayo Valyekano» jamoalari o‘zaro bahs olib bordi. Gollarga boy kechgan uchrashuv 3:3 hisobidagi durang bilan yakunlandi.
San-sebastyanliklar sardori Mikel Oyarsabal mazkur o‘yinda dublga erishib, o‘z faoliyatidagi yangi shaxsiy rekordni o‘rnatdi. Endilikda uning hisobidagi mavsum davomida urilgan gollar soni 14 taga yetdi. E’tiborli jihati, futbolchi ushbu natijaga 29 ta uchrashuvda erishdi. Ta’kidlash joizki, Oyarsabal mavsumning ayrim qismini jarohatlar va diskvalifikasiyalar sababli o‘tkazib yuborishga majbur bo‘lgan edi.
Ushbu durangdan so‘ng «Real Sosyedad» turnir jadvalida 8-o‘rinni egallab turibdi. Jamoa navbatdagi turni safarda «Sevilya»ga qarshi o‘tkazadi. Mazkur bahs 4 may, dushanba kuniga belgilangan.
