Испания Ла Лигасининг 32-турида «Реал Сосьедад» ҳамда «Райо Вальекано» жамоалари ўзаро баҳс олиб борди. Голларга бой кечган учрашув 3:3 ҳисобидаги дуранг билан якунланди.
Сан-себастьянликлар сардори Микель Оярсабаль мазкур ўйинда дублга эришиб, ўз фаолиятидаги янги шахсий рекордни ўрнатди. Эндиликда унинг ҳисобидаги мавсум давомида урилган голлар сони 14 тага етди. Эътиборли жиҳати, футболчи ушбу натижага 29 та учрашувда эришди. Таъкидлаш жоизки, Оярсабаль мавсумнинг айрим қисмини жароҳатлар ва дисквалификациялар сабабли ўтказиб юборишга мажбур бўлган эди.
Ушбу дурангдан сўнг «Реал Сосьедад» турнир жадвалида 8-ўринни эгаллаб турибди. Жамоа навбатдаги турни сафарда «Севилья»га қарши ўтказади. Мазкур баҳс 4 май, душанба кунига белгиланган.
