Ispaniya chempionatining 32-turida «Barselona» safarda «Xetafe» ustidan 2:0 hisobida ishonchli g‘alabaga erishdi.

Kataloniyaliklarning ikkinchi goliga zaxiradan maydonga tushgan ingliz hujumchisi Markus Reshford mualliflik qildi. Ushbu gol «Barselona» uchun joriy mavsumda zaxiradan o‘yinga qo‘shilgan futbolchilar tomonidan kiritilgan 17-gol bo‘ldi.

Statistik ma’lumotlarga ko‘ra, kuchli beshlik chempionatlarida faqatgina bir jamoa bu borada «Barsa»dan yaxshiroq natija qayd etgan. Myunxenning «Bavariya» klubi a’zolari zaxiradan tushib, raqiblar darvozasini 18 bor ishg‘ol etishgan. Ta’kidlash joizki, myunxenliklar allaqachon Germaniya chempionligini muddatidan oldin naqd qilib bo‘lishgan.

Ispaniyada ham chempionlik taqdiri deyarli hal bo‘lgan ko‘rinadi. «Xetafe» ustidan qozonilgan g‘alabadan so‘ng «Barselona»ning eng yaqin ta’qibchisi — Madridning «Real» klubi bilan oradagi farqi 11 ochkoga yetdi.