Испания чемпионатининг 32-турида «Барселона» сафарда «Хетафе» устидан 2:0 ҳисобида ишончли ғалабага эришди.

Каталонияликларнинг иккинчи голига захирадан майдонга тушган инглиз ҳужумчиси Маркус Рэшфорд муаллифлик қилди. Ушбу гол «Барселона» учун жорий мавсумда захирадан ўйинга қўшилган футболчилар томонидан киритилган 17-гол бўлди.

Статистик маълумотларга кўра, кучли бешлик чемпионатларида фақатгина бир жамоа бу борада «Барса»дан яхшироқ натижа қайд этган. Мюнхеннинг «Бавария» клуби аъзолари захирадан тушиб, рақиблар дарвозасини 18 бор ишғол этишган. Таъкидлаш жоизки, мюнхенликлар аллақачон Германия чемпионлигини муддатидан олдин нақд қилиб бўлишган.

Испанияда ҳам чемпионлик тақдири деярли ҳал бўлган кўринади. «Хетафе» устидан қозонилган ғалабадан сўнг «Барселона»нинг энг яқин таъқибчиси — Мадриднинг «Реал» клуби билан орадаги фарқи 11 очкога етди.