«Koventri Siti» jamoasi Chempionshipning 45-turi doirasida kechgan bahsda «Reksxem» ustidan 3:1 hisobida g‘alaba qozondi.
Uchrashuv yakunlangach, «ko‘k osmonranglilar»ni turnirdagi g‘oliblik bilan taqdirlash marosimi bo‘lib o‘tdi. Jamoa a’zolariga chempionlik kubogi va oltin medallar topshirildi.
Qayd etish joizki, «Chelsi»ning sobiq afsonasi va sobiq bosh murabbiyi Frenk Lempard qo‘l ostidagi jamoa 2001 yildan buyon ilk bor Angliya Premyer-ligasida ishtirok etish huquqini qo‘lga kiritdi. Shu tariqa, «Koventri Siti» 25 yillik tanaffusdan so‘ng yana mamlakatning eng kuchli divizioniga qaytmoqda.
