Superliga 10-turidan o‘rin olgan "Mash’al" - "Buxoro" (0:1) uchrashuvidan so‘ng buxoroliklar ustozi Aleksandr Xomyakov o‘yindan keyingi matbuot anjumanida ishtirok etdi.

"O‘yin qiyin kechishini bilgandik. "Mash’al" ilk ochkolarni qo‘lga kiritishga intilmoqda. Asabiy o‘yin bo‘ladi deb taxmin qilgandim, shunday ham bo‘ldi. Ikki jamoada ham vaziyatlar bo‘ldi. Birinchi bo‘limda ayniqsa bizda. Qiziqarli bahs guvohiga aylandik. Yigitlarni maqtayman. Birinchi bo‘limda vaziyatlarimizni ko‘kka sovurdik. Muxlislarni g‘alaba bilan qutlayman. Oldinda yana bir tur qoldi va keyin tanaffus bo‘ladi", - deya gap boshladi Aleksandr Xomyakov.

- "Mash’al" o‘nta o‘yindan beri yutqazmoqda. "Buxoro" bugun bunday jamoani osonlikcha mag‘lub etishi kerak emasmidi?

- Har bir o‘yin o‘ziga yarasha qiyin. Biroz boshqacharoq o‘yin namoyish etishimizni istardim, ammo bugungi o‘yin o‘tib bo‘ldi. Yigitlar futbolga to‘yib qolgandek. O‘yinlar soni ko‘payib ketdi. Meni xavotirga solayotgan ayrim jihatlar bor. Muhimi, uch ochko qo‘lga kiritildi.

- "Buxoro" 13ta gol urib, 10ta to‘p o‘tkazib yubordi. Himoya chizig‘ining bunday ko‘rsatkichlari sizni xavotirga solmayaptimi?

- Albatta o‘ylantiryapti. Ketma-ket uch o‘yindan beri birinchi bo‘lib gol o‘tkazib yuboryapmiz. Bugungi maqsadimiz dastlabki 15 daqiqada gol o‘tkazib yubormaslik edi. To‘plar nisbatiga e’tibor beryapmiz. Gol o‘tkazmaslikni istaymiz, ammo bu futbol. Raqiblar darajasi yuqori va boshqa faktorlar ko‘p. Shuning uchun, ushbu jihat meni unchalik o‘ylantirmayapti. Osonlikcha gol o‘tkazayotganimiz ko‘proq o‘ylantirishi kerak.

- Nika Kacharava majburiy o‘zgarish bo‘ldimi?

- Jarohati qanchalik og‘ir ekanligini endi bilamiz. Asosiy tarkibda endi maydonga tushgandi. Yomon o‘yin o‘tkazmadi, nazarimda.