Myunxenning «Bavariya» klubi kuzatuv kengashi a’zosi Karl-Xayns Rummenigge hujumchi Harri Keynning yangi bosh murabbiy Vensan Kompani kelganidan keyingi o‘zgarishlari haqida gapirdi.
«Keyn Kompani boshqaruvida katta transformasiyani boshdan kechirdi. U doim ko‘p gol uradigan ajoyib hujumchi bo‘lgan. Ammo endi u haqiqiy pleymeykerga aylandi: maydon markazigacha tushib, o‘zining uzun va aniq uzatmalari bilan Olise hamda Dias kabi sheriklarini o‘yinga qo‘shmoqda. Bu bizning o‘yin uslubimiz uchun juda muhim», — dedi Rummenigge T-Online nashriga.
Ma’lumot uchun, Harri Keyn «Bavariya» libosida jami 141 ta o‘yinda maydonga tushib, 138 ta gol va 32 ta golli uzatmaga mualliflik qildi. Angliyalik to‘purarning shartnomasi 2026/2027 yilgi mavsum yakunigacha amal qiladi. Eslatib o‘tamiz, «Bavariya» muddatidan oldin Germaniya chempionligini qo‘lga kiritib bo‘lgan.
