«RB Leypsig» klubi bosh murabbiy Ole Verner bilan hamkorlikni davom ettirishga tayyorgarlik ko‘rmoqda. Bu haqda nemis jurnalisti Filipp Ginse o‘z ijtimoiy tarmoqlarida ma’lum qildi.

Vernerning hozirdagi kelishuvi 2027 yilgacha amal qiladi. Klub va murabbiy o‘rtasidagi muzokaralar mavsum yakunlanganidan keyingi davrga rejalashtirilgan. Har ikki tomon ham uzoq muddatli hamkorlikdan manfaatdor, biroq yakuniy qaror hali qabul qilinmagan.

Klubning asosiy vazifasi — Chempionlar ligasidagi o‘rnini saqlab qolish. Ayni damda «RB Leypsig» Bundesligada uchinchi o‘rinda bormoqda. Jamoa beshinchi o‘rindagi «Xoffenxaym»ni 5 ochkoga ortda qoldirmoqda, mavsum yakuniga qadar esa atigi 3 ta o‘yin qoldi.

Ole Verner hozirgi lavozimini 2025 yildan beri egallab kelmoqda. Bungacha mutaxassis «Verder» va «Xolshtayn» klublarida faoliyat yuritgan.