«Liverpul» klubi yozgi transfer oynasi oldidan «Napoli» markaziy himoyachisi Sem Byokemani kuzatmoqda. Bu haqda TEAMtalk nashri xabar bermoqda.

Manbaning ma’lumotlariga ko‘ra, mersisaydliklar bosh murabbiyi Arne Slot 27 yoshli futbolchining qobiliyatini yuqori baholaydi. Mutaxassis Byokemani hali Niderlandiyada ishlab yurgan kezlaridayoq o‘z jamoasiga qo‘shib olishni istagan edi. «Napoli» esa futbolchining transferi bo‘yicha 35 million yevrodan yuqori bo‘lgan takliflarni ko‘rib chiqishga tayyor.

Joriy mavsumda Byokema barcha turnirlarda 30 ta o‘yinda ishtirok etdi va o‘z hisobiga ikkita gol yozdirib qo‘ydi. Futbolchining klub bilan amaldagi shartnomasi 2030 yilning yoziga qadar mo‘ljallangan. Transfermarkt portali taqdim etgan ma’lumotlarga ko‘ra, himoyachining bozor qiymati 25 million yevroni tashkil etadi.