«Tottenxem» hujumchisi Dominik Solanke «Vulverxempton»ga qarshi kechgan so‘nggi o‘yinda jarohat oldi. London klubi hozircha futbolchining holati haqida ma’lumotlarni ochiqlagani yo‘q. Solanke borasidagi yangiliklar bilan Roberto De Dzerbi juma kungi matbuot anjumanida o‘rtoqlashishi kutilmoqda.
The Telegraph nashriga ma’lum bo‘lishicha, dastlabki tibbiy ko‘rik Solankeda tizza osti payining ikkinchi darajali jarohati bo‘lishi mumkinligini ko‘rsatgan. Bunday jarohatdan tiklanish muddati uch haftadan sakkiz haftagacha davom etishi mumkin.
Shu tariqa, Solanke mavsumning qolgan qismini o‘tkazib yuborishi ehtimoli bor. Bundan tashqari, ushbu jarohat hujumchining Jahon chempionatida ishtirok etish orzulariga chek qo‘yishi mumkin. Eslatib o‘tamiz, mart oyida Solanke Angliya terma jamoasiga chaqirilgan edi.
