Mashhur ingliz sobiq futbolchisi Jeymi Karrager Chempionlar ligasi yarim finali doirasidagi «Atletiko Madrid»ga qarshi o‘yinda «Arsenal» darvozasiga belgilangan penaltini keskin tanqid qildi.
«Matraschilar» ikkinchi bo‘lim boshida, Ben Uayt to‘pni qo‘li bilan o‘ynagani uchun o‘n bir metrlik jarima zarbasi tepish huquqini qo‘lga kiritishdi. Xulian Alvares zarbani aniq amalga oshirib, hisobni tenglashtirdi — 1:1. Uchrashuvning qolgan vaqtida boshqa gol urilmadi.
«Bu kabi qarorlar menga yoqmaydi. O‘sha vaziyatda Uayt nima qilishi kerak edi? Bu meni g‘azablantirmoqda! Va bu holat Chempionlar ligasi finali yo‘llanmasi taqdirini hal qilib qo‘yishi mumkin. Bu noto‘g‘ri, adolatsizlik va butun turnir obro‘siga tushgan dog‘dir», — dedi Karrager CBS Sports studiyasida.
Ta’kidlash joizki, «Arsenal» ham o‘z golini penaltidan kiritgan edi — 44-daqiqada Viktor Dyokeresh ajralib turdi.
