Машҳур инглиз собиқ футболчиси Жейми Каррагер Чемпионлар лигаси ярим финали доирасидаги «Атлетико Мадрид»га қарши ўйинда «Арсенал» дарвозасига белгиланган пенальтини кескин танқид қилди.
«Матрасчилар» иккинчи бўлим бошида, Бен Уайт тўпни қўли билан ўйнагани учун ўн бир метрлик жарима зарбаси тепиш ҳуқуқини қўлга киритишди. Хулиан Альварес зарбани аниқ амалга ошириб, ҳисобни тенглаштирди — 1:1. Учрашувнинг қолган вақтида бошқа гол урилмади.
«Бу каби қарорлар менга ёқмайди. Ўша вазиятда Уайт нима қилиши керак эди? Бу мени ғазаблантирмоқда! Ва бу ҳолат Чемпионлар лигаси финали йўлланмаси тақдирини ҳал қилиб қўйиши мумкин. Бу нотўғри, адолатсизлик ва бутун турнир обрўсига тушган доғдир», — деди Каррагер CBS Sports студиясида.
Таъкидлаш жоизки, «Арсенал» ҳам ўз голини пенальтидан киритган эди — 44-дақиқада Виктор Дьёкереш ажралиб турди.
