UYEFA ijtimoiy tarmoqlar orqali Chempionlar ligasida haftaning eng yaxshi o‘yinchisini e’lon qildi. Unga ko‘ra, «PSJ» hujumchisi Usmon Dembele ushbu sovringa loyiq topildi.

Yarim finalning «Bavariya»ga qarshi birinchi uchrashuvida Dembele dubl qayd etdi va bir golli uzatmani amalga oshirdi. O‘yin «PSJ»ning 5:4 hisobidagi g‘alabasi bilan yakunlandi.

Javob uchrashuvi 6 may kuni Myunxenda bo‘lib o‘tadi.

Joriy mavsum Chempionlar ligasida Dembele 11 ta o‘yinda ishtirok etib, 6 ta gol va 3 ta assistga mualliflik qilgan. Usmon — amaldagi «Oltin to‘p» sohibi.

«PSJ» o‘tgan mavsum qo‘lga kiritgan Chempionlar ligasi chempionligini himoya qilmoqda. Ushbu mavsumning ikkinchi yarim finalida esa «Arsenal» va «Atletiko» o‘zaro bahs olib bormoqda. Final uchrashuvi 23 may kuni Budapesht shahrida bo‘lib o‘tadi.