УЕФА ижтимоий тармоқлар орқали Чемпионлар лигасида ҳафтанинг энг яхши ўйинчисини эълон қилди. Унга кўра, «ПСЖ» ҳужумчиси Усмон Дембеле ушбу совринга лойиқ топилди.
Ярим финалнинг «Бавария»га қарши биринчи учрашувида Дембеле дубль қайд этди ва бир голли узатмани амалга оширди. Ўйин «ПСЖ»нинг 5:4 ҳисобидаги ғалабаси билан якунланди.
Жавоб учрашуви 6 май куни Мюнхенда бўлиб ўтади.
Жорий мавсум Чемпионлар лигасида Дембеле 11 та ўйинда иштирок этиб, 6 та гол ва 3 та ассистга муаллифлик қилган. Усмон — амалдаги «Олтин тўп» соҳиби.
«ПСЖ» ўтган мавсум қўлга киритган Чемпионлар лигаси чемпионлигини ҳимоя қилмоқда. Ушбу мавсумнинг иккинчи ярим финалида эса «Арсенал» ва «Атлетико» ўзаро баҳс олиб бормоқда. Финал учрашуви 23 май куни Будапешт шаҳрида бўлиб ўтади.













