Londonning «Arsenal» klubi sardori Martin Edegor Chempionlar ligasi yarim finali doirasida Madridning «Atletiko» jamoasiga qarshi bo‘lib o‘tadigan javob uchrashuvini o‘tkazib yuborish xavfi ostida qoldi.

Yarim himoyachi chorshanba kuni Madridda bo‘lib o‘tgan dastlabki o‘yinning (1:1) 57-daqiqasida almashtirilgan edi. Arsenal Radar bergan ma’lumotga ko‘ra, norvegiyalik futbolchi navbatdagi jarohatini olgan. Klub 27 yoshli o‘yinchining holatini Premyer-liganing navbatdagi turi doirasidagi «Fulxem»ga qarshi bahs oldidan baholaydi. Agar voqealar rivoji salbiy ko‘rinish olsa, xavbek nafaqat shanba kungi «dala hovli egalari» bilan o‘yinni, balki 5 may kuni Londonda «matraschilar»ga qarshi kechadigan yarim final javob jangini ham o‘tkazib yuboradi.

Martin Edegor butun mavsum davomida tizzasidagi muammolardan aziyat chekmoqda. U joriy mavsumda 32 bor maydonga tushib, bitta gol va yettita golli uzatmani amalga oshirdi.