Xarvi Elliottning «Aston Villa»dagi omadsiz ijara muddatidan so‘ng, uning «Liverpul»dagi kelajagi so‘roq ostida qolmoqda. Daily Mail nashrining xabar berishicha, futbolchining «Enfild»ga qaytishi hozirda «amrimahol, biroq imkonsiz emas» deb baholanmoqda.

23 yoshli futbolchi «Villa» safiga ijara asosida o‘tgan edi. Kelishuvga ko‘ra, agar Elliott ma’lum miqdordagi o‘yinlarda maydonga tushsa, Birmingem klubi uni 35 million funt sterling evaziga sotib olish majburiyatini olgandi. Biroq jarayon rejadagidek kechmadi va bu mavsum yarim himoyachi uchun ancha qiyin o‘tdi.

Xarvi Elliott «Aston Villa» safida jami 9 ta o‘yinda ishtirok etdi (asosan zaxiradan maydonga tushdi) va bor-yo‘g‘i bitta gol muallifiga aylandi.

Shunga qaramay, Elliottga xorij klublari tomonidan qiziqish hamon saqlanib qolmoqda. Xususan, Bundesliga jamoalari avval ham uni kuzatib kelishgan va shu yozda bu qiziqish yana jonlanishi mumkin.

Atigi bir yil oldin, ayniqsa, 21 yoshgacha bo‘lgan futbolchilar o‘rtasidagi Yevropa chempionatidagi yorqin ishtirokidan so‘ng, uning nufuzi butun Yevropa bo‘ylab juda baland edi. Biroq o‘tgan yil davomida uning transfer qiymati sezilarli darajada pasaygani taxmin qilinmoqda. Shunday bo‘lsa-da, kelayotgan transfer oynasida unga xaridorlar topilishi kutilyapti.