Харви Эллиоттнинг «Астон Вилла»даги омадсиз ижара муддатидан сўнг, унинг «Ливерпуль»даги келажаги сўроқ остида қолмоқда. Daily Mail нашрининг хабар беришича, футболчининг «Энфилд»га қайтиши ҳозирда «амримаҳол, бироқ имконсиз эмас» деб баҳоланмоқда.

23 ёшли футболчи «Вилла» сафига ижара асосида ўтган эди. Келишувга кўра, агар Эллиотт маълум миқдордаги ўйинларда майдонга тушса, Бирмингем клуби уни 35 миллион фунт стерлинг эвазига сотиб олиш мажбуриятини олганди. Бироқ жараён режадагидек кечмади ва бу мавсум ярим ҳимоячи учун анча қийин ўтди.

Харви Эллиотт «Астон Вилла» сафида жами 9 та ўйинда иштирок этди (асосан захирадан майдонга тушди) ва бор-йўғи битта гол муаллифига айланди.

Шунга қарамай, Эллиоттга хориж клублари томонидан қизиқиш ҳамон сақланиб қолмоқда. Хусусан, Бундеслига жамоалари аввал ҳам уни кузатиб келишган ва шу ёзда бу қизиқиш яна жонланиши мумкин.

Атиги бир йил олдин, айниқса, 21 ёшгача бўлган футболчилар ўртасидаги Европа чемпионатидаги ёрқин иштирокидан сўнг, унинг нуфузи бутун Европа бўйлаб жуда баланд эди. Бироқ ўтган йил давомида унинг трансфер қиймати сезиларли даражада пасайгани тахмин қилинмоқда. Шундай бўлса-да, келаётган трансфер ойнасида унга харидорлар топилиши кутиляпти.