«Nyukasl» himoyachisi Tino Livramento yozda Londonning «Arsenal» klubiga o‘tishiga ishonch bildirmoqda. Bu haqda Football365 xabar bermoqda.

Jurnalist Ben Jeykobsning ma’lumotlariga ko‘ra, «Manchester Siti»da ham qiziqish uyg‘otgan Livramento hozirgi klubini 81 million yevro evaziga tark etishi mumkin. «Arsenal» yozda jamoadan ketishi kutilayotgan Ben Uaytga o‘rinbosar qidirmoqda va Livramento eng mos nomzodlardan biri sifatida ko‘rilmoqda.

Garchi ingliz futbolchisining o‘zi transfer amalga oshishiga shubha qilmayotgan bo‘lsa-da, klublar o‘rtasida hali rasmiy muzokaralar boshlangani yo‘q.

Joriy mavsumda 23 yoshli Livramento 26 ta o‘yinda maydonga tushib, 1 ta golli uzatmani amalga oshirdi va 1 ta ogohlantirish oldi.