Dortmundning «Borussiya» klubi bosh murabbiyi Niko Kovach jamoaning o‘yin uslubiga nisbatan bildirilayotgan tanqidlarga javob qaytardi. Ayni damda jamoa Bundesligada 31 ta o‘yindan so‘ng 67 ochko to‘plagan holda ikkinchi o‘rinda bormoqda.

«Ruxsat bersangiz, men ham bir savol bersam: "Bundesligada «Bavariya»dan tashqari yana kim doimiy ravishda jozibador futbol ko‘rsatmoqda?". Va muvaffaqiyatdan ko‘ra jozibadorlik muhimroqmi? Bundesliga har bir namoyishi bir xil bo‘ladigan teatr emas. Ko‘p narsani oldindan aytib bo‘lmaydi. Deyarli hech qaysi klub o‘z muxlislariga har hafta to‘rtta gol va tomoshabop hujumkor futbol taqdim eta olmaydi.

O‘ylaymanki, biz ushbu mavsumda, shubhasiz, juda yaxshi va jozibador futbol namoyish etdik. Bizga yetishmayotgan narsa esa «Bavariya»da haddan ziyod ko‘p. Ularda ko‘plab alohida o‘yinchilardan iborat aql bovar qilmas darajada kuchli tarkib bor. Bu mavsumda ular jozibadorlikni muvaffaqiyat bilan juda yaxshi uyg‘unlashtira olishdi. 31 o‘yinda 113 ta gol — bu aql bovar qilmas natija. Hatto Angliyaning eng boy klublari ham hozirda bu bilan maqtana olmaydi. Buni hasadsiz tan olish kerak», — dedi Niko Kovach FAZ nashriga bergan intervyusida.