Дортмунднинг «Боруссия» клуби бош мураббийи Нико Ковач жамоанинг ўйин услубига нисбатан билдирилаётган танқидларга жавоб қайтарди. Айни дамда жамоа Бундеслигада 31 та ўйиндан сўнг 67 очко тўплаган ҳолда иккинчи ўринда бормоқда.

«Рухсат берсангиз, мен ҳам бир савол берсам: "Бундеслигада «Бавария»дан ташқари яна ким доимий равишда жозибадор футбол кўрсатмоқда?". Ва муваффақиятдан кўра жозибадорлик муҳимроқми? Бундеслига ҳар бир намойиши бир хил бўладиган театр эмас. Кўп нарсани олдиндан айтиб бўлмайди. Деярли ҳеч қайси клуб ўз мухлисларига ҳар ҳафта тўртта гол ва томошабоп ҳужумкор футбол тақдим эта олмайди.

Ўйлайманки, биз ушбу мавсумда, шубҳасиз, жуда яхши ва жозибадор футбол намойиш этдик. Бизга етишмаётган нарса эса «Бавария»да ҳаддан зиёд кўп. Уларда кўплаб алоҳида ўйинчилардан иборат ақл бовар қилмас даражада кучли таркиб бор. Бу мавсумда улар жозибадорликни муваффақият билан жуда яхши уйғунлаштира олишди. 31 ўйинда 113 та гол — бу ақл бовар қилмас натижа. Ҳатто Англиянинг энг бой клублари ҳам ҳозирда бу билан мақтана олмайди. Буни ҳасадсиз тан олиш керак», — деди Нико Ковач FAZ нашрига берган интервьюсида.