«Bavariya»ning Bundesligadagi mag‘lubiyatsiz seriyasi davom etmoqda.

Bugun Vensan Kompani shogirdlari Germaniya chempionatining 32-turida so‘nggi pog‘onada borayotgan «Xaydenxaym» bilan 3:3 hisobida durang o‘ynadi. Myunxenliklar 100-daqiqada raqib tomonidan yo‘l qo‘yilgan avtogol evaziga mag‘lubiyatdan qutulib qolishdi.

Myunxen klubi 24 yanvardan beri — o‘shanda jamoa «Augsburg»ga (1:2) imkoniyatni boy bergan edi — chempionatda biror marta mag‘lub bo‘lmadi. O‘shandan buyon «Bavariya» mazkur turnirda 13 ta o‘yin o‘tkazib, 10 ta g‘alaba va 3 ta durang qayd etdi.

Eslatib o‘tamiz, Myunxen klubi joriy mavsumda Germaniya chempionligini allaqachon naqd qilib qo‘ygan. Jamoa hisobida 83 ochko mavjud.