«Бавария»нинг Бундеслигадаги мағлубиятсиз серияси давом этмоқда.

Бугун Венсан Компани шогирдлари Германия чемпионатининг 32-турида сўнгги поғонада бораётган «Хайденхайм» билан 3:3 ҳисобида дуранг ўйнади. Мюнхенликлар 100-дақиқада рақиб томонидан йўл қўйилган автогол эвазига мағлубиятдан қутулиб қолишди.

Мюнхен клуби 24 январдан бери — ўшанда жамоа «Аугсбург»га (1:2) имкониятни бой берган эди — чемпионатда бирор марта мағлуб бўлмади. Ўшандан буён «Бавария» мазкур турнирда 13 та ўйин ўтказиб, 10 та ғалаба ва 3 та дуранг қайд этди.

Эслатиб ўтамиз, Мюнхен клуби жорий мавсумда Германия чемпионлигини аллақачон нақд қилиб қўйган. Жамоа ҳисобида 83 очко мавжуд.