«Barselona» va Ispaniya terma jamoasi sobiq himoyachisi, Segunda ishtirokchisi «Andorra» klubi hammuallifi Jerar Pike yana hakamlikdan norozi bo‘ldi. Jamoasining «Albasete»dan uchralgan mag‘lubiyatidan (0:1) so‘ng, Pike ijtimoiy tarmoqlardagi sahifalarida arbitr o‘z vazifasini uddalay olmaganini yozib qoldirdi.

Diqqat markazida o‘tkazib yuborilgan gol bilan bog‘liq vaziyat bo‘ldi — Pikening fikricha, o‘sha vaziyatda raqib tomonidan qoida buzilgan, biroq bosh hakam va VARdagilar buni e’tiborsiz qoldirgan.

Uchrashuv yakuni maydondan chetlatishlar, shuningdek, tribuna osti yo‘lagida Pike ishtirokidagi janjal va hakamlarni haqorat qilish bilan xotima topdi. O‘yin qaydnomasida Pike o‘zini agressiv tutgani qayd etilgan.

Ayni damda uning jamoasi 9-o‘rinda bormoqda va yuqori o‘rinlar uchun kurashdan deyarli chiqib ketgan. Ma’lumot uchun, Pike kelguniga qadar «Andorra» Kataloniyaning mintaqaviy ligalarida yurgan edi.