Londonning «Arsenal» klubi bosh murabbiyi Mikel Arteta «Fulxem» ustidan qozonilgan g‘alabadan (3:0) so‘ng vinger Bukayo Saka haqida o‘z fikrlarini bildirdi. 24 yoshli futbolchi uchrashuvning 9-daqiqasida Viktor Dyokereshga golli uzatma yetkazdi, 40-daqiqada esa o‘z nomini tabloga yozdirib qo‘ydi. Biroq u ikkinchi bo‘limda maydonga tushmadi: tanaffusda «kanonirlar» ustozi uni Noni Maduekega almashtirdi.

«Bukayo o‘yin taqdiriga shubhasiz ta’sir ko‘rsatdi. U uchrashuv taqdirini hal qilgan ikkita samarali harakatni amalga oshirdi va biz uning nimalarga qodirligini yaxshi bilamiz. Saka mavsumning eng muhim pallasida safga qaytdi — u kuchga to‘la va g‘alabaga chanqoq. Unga mana shunday o‘yin kerak edi. Biz uni almashtirishga majbur edik. Bukayo Madridda 30 daqiqacha harakat qildi, hozir esa 45 daqiqa o‘ynadi. Yuklamani asta-sekin oshirib borishimiz va ehtiyotkorlikni saqlashimiz lozim — u bizga juda kerak», — deya jurnalist Konnor Xamm Artetaning so‘zlaridan iqtibos keltirmoqda.

Seshanba kuni, 5 mayda, «Arsenal» Chempionlar ligasi yarim finalining javob uchrashuvi doirasida «Atletiko»ni qabul qiladi.