«Tottenxem»ning sobiq bosh murabbiyi Garri Rednapp «Arsenal»ning London derbisidagi g‘alabasidan so‘ng o‘z fikrlari bilan o‘rtoqlashdi. Mikel Arteta shogirdlari «Fulxem»ni 3:0 hisobida mag‘lub etdi, gollarga Viktor Dyokeresh (dubl) va Bukayo Saka mualliflik qilishdi.

«Arsenal»dan ajoyib g‘alaba. Bugun g‘alaba qozonish juda muhim edi. Jamoaning bu ishni uddalagani, ayniqsa, birinchi bo‘limdagi o‘yini tahsinga loyiq. Maylz Lyuis-Skellining maydonda ko‘rinishi kutilmagan hol bo‘ldi, ammo u dastlabki daqiqalardan boshlab haqiqiy energiya va shijoat ko‘rsata oldi. Bu qolgan futbolchilarga ham qo‘shimcha kuch va xotirjamlik bag‘ishladi. Ushbu o‘zgarish uchun Arteta katta maqtovlarga loyiq», — deya ekspertning so‘zlaridan iqtibos keltiradi Sky Sports.

Hozirda «to‘pchilar» 76 ochko bilan turnir jadvalida peshqadamlik qilmoqda. Ikkinchi o‘rindagi «Manchester Siti» hisobida 70 ochko mavjud, biroq «shaharliklar» zaxirasida yana 2 ta o‘yin bor.