«Chelsi»ning sobiq darvozaboni Peter Chex London klubining yangi rahbariyat ostidagi strategiyasi haqida o‘z fikrlari bilan o‘rtoqlashdi.

«Siz nimaga erishmoqchi ekaningizga qarashingiz kerak. Sizda yosh, iqtidorli o‘yinchilar bo‘lishi va ular bilan g‘alaba qozonishingiz mumkin, ammo bunga juda kamdan-kam hollarda erishiladi. Agar siz yosh, iqtidorli futbolchilarni jalb qilish va ularni rivojlantirishga e’tibor qaratsangiz — bu bir masala, lekin har mavsumda g‘alaba qozonish va raqobatlashishni istasangiz — bular bir-biriga mos kelmaydigan narsalar. Siz falsafangizni o‘zgartirishingiz kerak.

Ba’zi narsalar bir-biriga to‘g‘ri kelmaydi, chunki Chempionlar Ligasi yoki APLda g‘olib chiqish uchun... Bu juda murakkab musobaqalar va siz barqaror bo‘lishingiz kerak. Sizga jamoaning kuchli o‘zagi (skeleti) kerak. Ana undan keyin yosh, iqtidorli o‘yinchilarni jalb qilishingiz mumkin. Ular tajribali futbolchilar ko‘magida tezroq o‘sadilar va qiyin damlarda ularga tayana oladilar.

Tarkibning aksariyati yoshlardan iborat bo‘lsa va ularda og‘ir vaziyatlardan chiqib ketish tajribasi bo‘lmasa, ular bir-biriga qarab: «Xo‘sh, menga kim yordam beradi?» deb o‘ylab qolishadi. Bu ular uchun juda qiyin bo‘lishi mumkin. Siz qaysi bosqichda ekaningizni va sizga aynan nima kerakligini anglab yetishingiz shart», — dedi Chex The Athletic nashriga bergan intervyusida.

Ayni damda «Chelsi» Angliya chempionati turnir jadvalida 34 turdan keyin 48 ochko jamg‘argan holda to‘qqizinchi o‘rinni egallab turibdi.