«Челси»нинг собиқ дарвозабони Петер Чех Лондон клубининг янги раҳбарият остидаги стратегияси ҳақида ўз фикрлари билан ўртоқлашди.

«Сиз нимага эришмоқчи эканингизга қарашингиз керак. Сизда ёш, иқтидорли ўйинчилар бўлиши ва улар билан ғалаба қозонишингиз мумкин, аммо бунга жуда камдан-кам ҳолларда эришилади. Агар сиз ёш, иқтидорли футболчиларни жалб қилиш ва уларни ривожлантиришга эътибор қаратсангиз — бу бир масала, лекин ҳар мавсумда ғалаба қозониш ва рақобатлашишни истасангиз — булар бир-бирига мос келмайдиган нарсалар. Сиз фалсафангизни ўзгартиришингиз керак.

Баъзи нарсалар бир-бирига тўғри келмайди, чунки Чемпионлар Лигаси ёки АПЛда ғолиб чиқиш учун... Бу жуда мураккаб мусобақалар ва сиз барқарор бўлишингиз керак. Сизга жамоанинг кучли ўзаги (скелети) керак. Ана ундан кейин ёш, иқтидорли ўйинчиларни жалб қилишингиз мумкин. Улар тажрибали футболчилар кўмагида тезроқ ўсадилар ва қийин дамларда уларга таяна оладилар.

Таркибнинг аксарияти ёшлардан иборат бўлса ва уларда оғир вазиятлардан чиқиб кетиш тажрибаси бўлмаса, улар бир-бирига қараб: «Хўш, менга ким ёрдам беради?» деб ўйлаб қолишади. Бу улар учун жуда қийин бўлиши мумкин. Сиз қайси босқичда эканингизни ва сизга айнан нима кераклигини англаб етишингиз шарт», — деди Чех The Athletic нашрига берган интервьюсида.

Айни дамда «Челси» Англия чемпионати турнир жадвалида 34 турдан кейин 48 очко жамғарган ҳолда тўққизинчи ўринни эгаллаб турибди.