«Milan» vingeri Kristian Pulishich oldinroq «Chelsi» safida to‘p tepgan Angliyaga qaytishi mumkin. Grem Beyli bergan ma’lumotlarga ko‘ra, amerikalik futbolchini o‘z safiga qo‘shib olishga «Manchester Yunayted» qiziqish bildirmoqda.
Futbolchining shartnomasi yakunlanishiga bor-yo‘g‘i 12 oy qolgan va o‘tgan yildan beri «rossonerilar» unga yangi kelishuv borasida hech qanday taklif bilan chiqishmagan. «Qizil iblislar» ham hozircha Pulishich transferi bo‘yicha rasmiy taklif yuborishmadi, biroq yaqin oylarda muzokaralarni boshlash niyatidalar.
Joriy mavsumda Kristian Pulishich «Milan» safida barcha turnirlarda 31 ta o‘yinda maydonga tushib, o‘nta gol urdi va uchta golli uzatmani amalga oshirdi.
