Madridning «Real» klubi markaziy himoyachisi Xoan Martines «Pari Sen-Jermen»ga o‘tishi mumkin. Parij grandining strategik maslahatchisi Luish Kampush 18 yoshli futbolchini sotib olishga qiziqish bildirdi.

Marca nashri bergan ma’lumotlarga ko‘ra, «PSJ» bir necha oydan beri «Kastilya»da to‘p tepayotgan yosh ispaniyalikni kuzatib kelmoqda. Klub rahbariyati Martines Parij klubining yangi strategiyasiga — ya’ni superyulduzlardan voz kechib, yosh iqtidorlarga stavka qilish tizimiga to‘liq mos keladi, deb hisoblamoqda.

Martinesni qo‘lga kiritish ancha qiyin bo‘ladi, chunki «qaymoqranglilar» unga katta umid bog‘lashgan va sotishni istashmayapti. Futbolchining «Real» bilan shartnomasi 2029 yilgacha amal qiladi, tovon puli esa 150 million yevroni tashkil etadi.