Мадриднинг «Реал» клуби марказий ҳимоячиси Хоан Мартинес «Пари Сен-Жермен»га ўтиши мумкин. Париж грандининг стратегик маслаҳатчиси Луиш Кампуш 18 ёшли футболчини сотиб олишга қизиқиш билдирди.
Marca нашри берган маълумотларга кўра, «ПСЖ» бир неча ойдан бери «Кастилья»да тўп тепаётган ёш испанияликни кузатиб келмоқда. Клуб раҳбарияти Мартинес Париж клубининг янги стратегиясига — яъни суперюлдузлардан воз кечиб, ёш иқтидорларга ставка қилиш тизимига тўлиқ мос келади, деб ҳисобламоқда.
Мартинесни қўлга киритиш анча қийин бўлади, чунки «қаймоқранглилар» унга катта умид боғлашган ва сотишни исташмаяпти. Футболчининг «Реал» билан шартномаси 2029 йилгача амал қилади, товон пули эса 150 миллион еврони ташкил этади.
