Madridning «Real» jamoasi bosh murabbiyi Alvaro Arbeloa Ispaniya chempionatining 34-turida «Espanyol»ga qarshi o‘yindan (2:0) so‘ng Vinisius Juniorni Kilian Mbappe bilan taqqoslash masalasiga munosabat bildirdi. Ushbu uchrashuvda braziliyalik vinger dubl qayd etdi, fransiyalik hujumchi esa jarohati sabab o‘yinda ishtirok etmadi.

Murabbiyga Vinisius Mbappega nisbatan jamoaviyroq o‘yinchi ekani haqida savol berildi.

— Yo‘q. Aniqrog‘i, men futbolchilarni solishtirishni istamayman. Bizga barcha o‘yinchilar kerak. Ilk kundanoq aytganman: har bir o‘yinda g‘alaba qozonish uchun hammaning hissasi va ishtiroki talab etiladi. Raqiblar bizdan ko‘proq yugurishini ko‘rsam, bu meni xavotirga soladi.

Bu faqat to‘psiz o‘yinga taalluqli emas — to‘p bilan harakatda ham shunday. Ko‘proq harakat, ko‘proq ochilish, to‘psiz yugurishlar kerak. Ba’zan uzatma olish uchun o‘n marta yugurishga to‘g‘ri keladi.

Barcha futbolchilar pressingda, himoyada va hujumda faol bo‘lishi shart. Zamonaviy futbolda faqat iste’dod yetarli emas — agar sen mukammal, mag‘lub etish qiyin bo‘lgan jamoa bo‘lmoqchi bo‘lasan.

Menga o‘yinchilarning shuni anglashi yoqadi: o‘yinda faol ishtirok etish — bu shunchaki muhim jihat emas, balki «Real» qadriyatlarining bir qismi. «Real Madrid» tarixi haqida gapirganda, bu shunchaki olifta futbolchilardan tashkil topgan jamoa emas, bu terga botgan, loyga belangan, kuch va fidoyilik bilan o‘yinni yakunlaydigan jamoa. Aynan shu narsa bizni jahonning eng yaxshi klubiga aylantiradi, — dedi Arbeloa.

Ma’lumot uchun, joriy mavsumda Kilian Mbappe barcha musobaqalarda 41 ta o‘yinda ishtirok etib, 41 ta gol va 6 ta assist qayd etgan. Vinisius Junior esa 50 ta o‘yinda 21 ta gol va 14 ta golli uzatmaga mualliflik qilgan.