Мадриднинг «Реал» жамоаси бош мураббийи Альваро Арбелоа Испания чемпионатининг 34-турида «Эспаньол»га қарши ўйиндан (2:0) сўнг Винисиус Жуниорни Килиан Мбаппе билан таққослаш масаласига муносабат билдирди. Ушбу учрашувда бразилиялик вингер дубль қайд этди, франциялик ҳужумчи эса жароҳати сабаб ўйинда иштирок этмади.

Мураббийга Винисиус Мбаппега нисбатан жамоавийроқ ўйинчи экани ҳақида савол берилди.

— Йўқ. Аниқроғи, мен футболчиларни солиштиришни истамайман. Бизга барча ўйинчилар керак. Илк кунданоқ айтганман: ҳар бир ўйинда ғалаба қозониш учун ҳамманинг ҳиссаси ва иштироки талаб этилади. Рақиблар биздан кўпроқ югуришини кўрсам, бу мени хавотирга солади.

Бу фақат тўпсиз ўйинга тааллуқли эмас — тўп билан ҳаракатда ҳам шундай. Кўпроқ ҳаракат, кўпроқ очилиш, тўпсиз югуришлар керак. Баъзан узатма олиш учун ўн марта югуришга тўғри келади.

Барча футболчилар прессингда, ҳимояда ва ҳужумда фаол бўлиши шарт. Замонавий футболда фақат истеъдод етарли эмас — агар сен мукаммал, мағлуб этиш қийин бўлган жамоа бўлмоқчи бўласан.

Менга ўйинчиларнинг шуни англаши ёқади: ўйинда фаол иштирок этиш — бу шунчаки муҳим жиҳат эмас, балки «Реал» қадриятларининг бир қисми. «Реал Мадрид» тарихи ҳақида гапирганда, бу шунчаки олифта футболчилардан ташкил топган жамоа эмас, бу терга ботган, лойга беланган, куч ва фидойилик билан ўйинни якунлайдиган жамоа. Айнан шу нарса бизни жаҳоннинг энг яхши клубига айлантиради, — деди Арбелоа.

Маълумот учун, жорий мавсумда Килиан Мбаппе барча мусобақаларда 41 та ўйинда иштирок этиб, 41 та гол ва 6 та ассист қайд этган. Винисиус Жуниор эса 50 та ўйинда 21 та гол ва 14 та голли узатмага муаллифлик қилган.