«Manchester Yunayted» bosh murabbiyi Maykl Kerrik «Liverpul» ustidan qozonilgan g‘alabadan so‘ng o‘z kelajagi borasidagi savollarga javob berdi. Yakshanba kuni mersisaydliklarga qarshi kechgan bahsdagi muvaffaqiyat (3:2) «qizil iblislar»ga Chempionlar ligasi yo‘llanmasini kafolatladi. Biroq amaldagi ustoz mavsum yakunlangach o‘z lavozimida qolish-qolmasligi hozircha noma’lumligicha qolmoqda.
«Agar jamoada qolmasam, hafsalam pir bo‘ladimi? Kutish kerak. Menimcha, men kelgan vaqtimda Chempionlar ligasiga qaytish istiqboli ancha yiroq ko‘rinayotgan edi. Biz shunday katta farqni yo‘qqa chiqarib, mavsum yakuniga uch tur qolganda YECHL yo‘llanmasini qo‘lga kiritganimiz — hayratlanarli yutuq. Ammo bu shunchaki bir qadam, biz buni haddan tashqari bayram qilmaymiz. Kelajakda nima bo‘lishidan qat’i nazar, men klub va futbolchilar uchun o‘z ishimni eng yaxshi tarzda bajarishga harakat qilaman. Ko‘ramiz», — deya Kerrikning so‘zlaridan iqtibos keltirmoqda UtdDistrict.
Angliyalik mutaxassis yanvar oyida Ruben Amorimning o‘rnini egallab, boshqaruvga kelgan edi.
