Ispaniyalik faxriy hujumchi Yago Aspas La Liganing navbatdagi turida yana gol urdi. U «Elche» darvozasini ishg‘ol qildi va uning jamoasi — «Selta» 3:1 hisobida g‘alaba qozondi. Vigo klubi La Liga turnir jadvalida oltinchi o‘ringa ko‘tarilib oldi va endilikda yevrokuboklarda ishtirok etish uchun da’vogarlik qilmoqda.
Bu Aspas uchun 2012/2013 yilgi mavsumdagi debyutidan beri Ispaniya chempionatidagi 171-gol bo‘ldi. Bu ko‘rsatkich shuni anglatadiki, u yuqori divizionda to‘p sura boshlagan davridan buyon eng samarador ispaniyalik hujumchiga aylandi. Ehtimol, u bundan ham ko‘proq gol urishi mumkin edi, biroq faoliyatining boshida «Selta» ma’lum muddat Segundada (Ispaniya ikkinchi divizioni) ishtirok etgan va Aspas o‘sha paytda gollarini aynan o‘sha yerda kiritgan edi.
