Испаниялик фахрий ҳужумчи Яго Аспас Ла Лиганинг навбатдаги турида яна гол урди. У «Эльче» дарвозасини ишғол қилди ва унинг жамоаси — «Сельта» 3:1 ҳисобида ғалаба қозонди. Виго клуби Ла Лига турнир жадвалида олтинчи ўринга кўтарилиб олди ва эндиликда еврокубокларда иштирок этиш учун даъвогарлик қилмоқда.

Бу Аспас учун 2012/2013 йилги мавсумдаги дебютидан бери Испания чемпионатидаги 171-гол бўлди. Бу кўрсаткич шуни англатадики, у юқори дивизионда тўп сура бошлаган давридан буён энг самарадор испаниялик ҳужумчига айланди. Эҳтимол, у бундан ҳам кўпроқ гол уриши мумкин эди, бироқ фаолиятининг бошида «Сельта» маълум муддат Сегундада (Испания иккинчи дивизиони) иштирок этган ва Аспас ўша пайтда голларини айнан ўша ерда киритган эди.