«PSJ» rahbariyati yozgi transfer oynasi oldidan hujumkor yarim himoyachi Randal Kolo Muanining taqdirini hal qildi.

Parijliklar bosh murabbiyi Luis Enrike Fransiya terma jamoasi a’zosini o‘z rejalariga kiritmagan va unga jamoaning uzoq muddatli loyihalarida o‘rin yo‘qligini ma’lum qilgan. Bu haqda insayder Nikolo Skira o‘zining X ijtimoiy tarmog‘idagi sahifasida xabar bermoqda.

27 yoshli futbolchi hozirda ijara asosida «Tottenxem»da to‘p surmoqda. U joriy mavsumda 37 ta o‘yinda maydonga tushib, 5 ta gol urdi va 4 ta golli uzatmani amalga oshirdi. Kolo Muanining ingliz klubi bilan ijara shartnomasi shu yozda yakuniga yetadi va u Parijga qaytishi kutilmoqda. Biroq «PSJ» rahbariyati futbolchi bilan butunlay xayrlashish niyatida va kelayotgan takliflarni ko‘rib chiqishga tayyor.

Futbolchining transfer narxi taxminan 40 million yevroga baholanmoqda. «PSJ» bo‘lajak transfer oynasida ushbu summa bo‘yicha aniq takliflarni kutadi.